سياسة الخصوصية

المعلومات لي كنجمعو

ملي تصايب حساب: الإيميل ديالك، والاسم إلا كتبتيه. كلمة السر ما كنشوفوهاش — كتتخزن مشفّرة عند Supabase وحتى حنا ما نقدروش نقراوها.

ملي تستعمل الموقع: التمارين لي حليتي، النتائج، الوقت لي دوزتي، الأخطاء لي كترتكب، والمواضيع لي تمرنتي عليها فـ Sprechen مع النص المكتوب ديال جوابك والتنقيط.

الإعدادات: المستوى لي ختارتي، تاريخ الامتحان إلا دخلتيه، والوقت لي بغيتي تقرا فيه كل نهار.

ملي تدخل بـ Google: كناخدو غير الاسم والإيميل. ما كنوصلوش لأي حاجة أخرى فحساب Google ديالك.

ما كنجمعوش: ما كاين حتى تتبّع إعلاني، لا cookies ديال التتبع، لا Google Analytics، لا Facebook Pixel، لا حتى أداة تحليل. تقدر تشوف كود الموقع بنفسك.

الصوت فـ Sprechen — خاصك تعرف هادشي

ملي تسجّل صوتك فتمارين Sprechen، الموقع كيستعمل خاصية Web Speech API لي كتجي مع المتصفح. فـ Chrome وEdge، هاد الخاصية كتصيفط الصوت ديالك لسيرفرات Google باش يتحول لنص. هادشي كيدير المتصفح ماشي حنا، وكيخضع لسياسة الخصوصية ديال Google.

حنا ما كنسجلوش ولا كنحتافظوش بالملف الصوتي. لي كيبقى عندنا هو النص المكتوب ديال لي قلتي والتنقيط، باش تقدر تراجع المحاولات ديالك.

إلا ما بغيتيش الصوت ديالك يمشي لـ Google، تقدر تكتب أجوبتك بدل ما تنطقهم — الموقع كيقبل الجوجة.

تصحيح Schreiben

التصحيح النحوي ديال النصوص لي كتكتب كيخدم داخل المتصفح ديالك بنموذج مدمج فـ Chrome. النص ديالك ما كيخرجش من الجهاز ديالك وما كيوصلش لينا ولا لأي شركة أخرى.

فين كتتخزن المعلومات

على الجهاز ديالك: التقدم ديالك كيتسجل فالمتصفح (localStorage) حتى إلا ما دخلتيش بحساب. هادشي كيخلي الموقع يخدم بلا أنترنت وبلا تسجيل.

عند Supabase: إلا دخلتي بحساب، التقدم كيتزامن مع قاعدة بيانات مستضافة عند Supabase باش تلقاه على أي جهاز.

عند Cloudflare: الموقع نفسه (الصفحات والصوتيات) مستضاف عند Cloudflare.

الشركات لي كنخدمو معاهم

Supabase — قاعدة البيانات والحسابات.

Cloudflare — استضافة الموقع.

Resend — كيصيفط رسائل تأكيد الإيميل وتغيير كلمة السر. كيتوصل غير بالإيميل ديالك.

Google — الخطوط (Google Fonts)، والدخول بـ Google إلا ختاريتيه، والتعرف على الكلام كما شرحنا فوق.

WhatsApp (Meta) — إلا صيفطي لينا باش تخلص، المحادثة كتكون عندهم حسب سياستهم.

ما كنبيعو معلوماتك لحتى واحد، وما كنقاسموهاش مع شي جهة أخرى غير هادو.

الخلاص

الخلاص كيتدار عبر WhatsApp بطريقة يدوية. ما كنجمعوش ولا كنخزنو أرقام الكارطات البنكية — ما كاين حتى نظام دفع إلكتروني فالموقع. لي كنسجلو هو غير: هاد الحساب عندو اشتراك، وإمتى كيسالي.

الحقوق ديالك

تشوف معلوماتك: كلشي لي عندنا عليك كيبان فصفحة الحساب وفلوحة التقدم.

تمسح الحساب: صيفط لينا وغادي نمسحو الحساب وكل المعلومات المرتبطة بيه. المسح نهائي وما كاين حتى رجوع.

تصدّر معلوماتك: طلب منا وغادي نعطيوك نسخة.

تستعمل الموقع بلا حساب: بلا حساب، التقدم كيبقى غير فالمتصفح ديالك وما كيوصلنا والو — ولكن التمارين المدفوعة كتبقى مسدودة.

الأطفال

الموقع موجّه لناس عندهم 16 سنة ولا كثر. إلا كنتي صغر من هادشي، خاصك إذن ديال الوالدين.

التغييرات والتواصل

إلا بدلنا شي حاجة فهاد السياسة، غادي نبدلو التاريخ لي تحت. باش تسولنا على أي حاجة ولا تطلب مسح الحساب، صيفط لينا عبر WhatsApp من صفحة الأسعار.